هاوسه‌رۆكی كه‌جه‌كه‌، لێدوانێك له‌باره‌ی ڕوداوه‌كانی‌  12ی ئازاری ساڵی 2004ی قامیشلۆ و هه‌ڵبژاردنه‌كانی داهاتوی توركیا و كوده‌تا سه‌ربازییه‌كه‌ی ساڵی 1971ی توركیا، بڵاوده‌كاته‌وه‌.

جه‌میل بایك، هاوسه‌رۆكی ده‌سته‌ی به‌ڕێوه‌به‌رایه‌تیی كۆماجڤاكێن كوردستان (كه‌جه‌كه‌)، له‌ راگه‌یه‌نراوێكدا كه‌ له‌ئاژانسی فوراتنیوز بلاَوكراوه‌ته‌وه‌، رایگه‌یاندوه‌: سه‌ركه‌وتنی كورد له‌ هه‌ڵبژاردنه‌كانی داهاتوی توركیا و باكووری كوردستان كه‌ 3هه‌فته‌ی ماوه‌، زۆر شت ئاشكرا ده‌كات بۆ كورد و سه‌ركه‌وتن له‌و هه‌ڵبژاردنه‌شدا به‌ واتای ئاشتی و خۆبه‌ڕێوه‌به‌ری و ئازادیی ئۆجه‌لان دێت و ئه‌و ده‌نگانه‌ی به‌ به‌ده‌په‌ش ده‌درێن، به‌و واتایه‌ دێت.

هاوسه‌رۆكی كه‌جه‌كه‌، له‌باره‌ی ڕوداوه‌كانی‌ 12ی ئازاری ساڵی 2004ی قامیشلۆشه‌وه‌ كه‌ به‌ گولله‌ی‌ رژێمی سوریا، 12هاوڵاتی له‌یاریگایه‌كی ئه‌و شاره‌دا، گیانیان له‌ده‌ستدا و سه‌دان كه‌سیش برینداربوون، رایگه‌یاندوه‌: ئه‌و كۆمه‌ڵكوژیه‌ی خۆرئاوای كوردستان، یه‌كێتیی نه‌ته‌وه‌یی به‌هێز كردو هه‌مووكاتیش كورد به‌نه‌فره‌تكردن ئه‌و رۆژه‌ بیردێنێته‌وه‌.

له‌باره‌ی كوده‌تا سه‌ربازییه‌كه‌ی 12ی ئازاری ساڵی 1971ی توركیاش، كه‌جه‌كه‌ ئاماژه‌ بۆ ئه‌وه‌ده‌كات كه‌ له‌مێژووی بزوتنه‌وه‌ی شۆڕشگێڕیی توركیادا، سه‌رده‌مێكی نوێی خوڵقاندوه‌، بۆیه‌ ئه‌وان به‌ڕێزه‌وه‌ یادی ئه‌و رۆژه‌ ده‌كه‌نه‌وه‌.