له‌ماوه‌ی‌ ساڵێكی‌ كابینه‌ی‌ حه‌وته‌مدا نزیكه‌ی‌ 10 جار نێچیرڤان بارزانی‌ و ئاشتی‌ هه‌ورامی‌ له‌سه‌ر داهاتی‌ نه‌وت بانگهێشتی‌ په‌رله‌مان كراون به‌ڵام به‌هیچ جۆرێك ئاماده‌نه‌بون,كه‌ دواترین بانگهێشتیان به‌ واژۆی‌ 25 په‌رله‌مانتار بووه‌, ئه‌ندامێكی‌ ئه‌نجومه‌نی‌ ژوری‌ بارزگانی‌ سلێمانی‌ ده‌ڵێت له‌سایه‌تی‌ سیسته‌می‌ نه‌وتی‌ هه‌رێمدا ئاینده‌ی‌ وڵات و حكومه‌تیش له‌مه‌ترسیدایه‌, به‌شێك له‌ شاره‌زایانی‌ ئابوریش ده‌ڵێن نه‌وتی‌ هه‌رێم ده‌یان كه‌سی‌ كردۆته‌ ملیار دێرو ملیۆنێر.

داهاتی‌ نه‌وتی‌ هه‌رێم, ئه‌و چیرۆكه‌ی‌ ماوه‌ی‌ 8 ساڵه‌ به‌شێكی‌ له‌زۆر له‌ هاوڵاتیان و په‌رله‌مانتاران و شاره‌زایانی‌ ئابوری‌ و ڕۆژنامه‌نوسانی‌ به‌خۆیه‌وه‌ سه‌رقاڵ كردووه‌, له‌سه‌ر ئه‌و پرسه‌ له‌ماوه‌ی‌ ساڵێكدا نزیكه‌ی‌ 10 جار نێچیرڤان بارزانی‌ و ئاشتی‌ هه‌ورامی‌ بانگێشی‌ په‌رله‌مان كراون به‌ڵام به‌هیچ جۆرێك ئاماده‌نه‌بون, هه‌رجارێكیش پرسیاری‌ داهات له‌ وه‌زیری‌ سامانه‌ سروشتیه‌كان ده‌كرێت له‌به‌رامبه‌ردا چه‌ندین تۆمه‌ت ده‌به‌خشێته‌وه‌.

ئه‌ندامێكی‌ ئه‌نجومه‌نی‌ ژوری‌ بازرگانی‌ سلێمانی‌ ده‌ڵێت له‌سایه‌ی‌ ناشه‌فافی‌ سیاسه‌تی‌ نه‌وتی‌ هه‌رێمدا ئاینده‌ی‌ گه‌ل و حكومه‌ت له‌مه‌ترسیدایه‌و ئاماژه‌ به‌وه‌ش ده‌كات ده‌یان كه‌س به‌هۆی‌ نه‌وته‌وه‌ بونه‌ته‌ ملیاردێرو ملیۆنێر.

سه‌ره‌ڕای‌ تێپه‌ڕبونی‌ نزیكه‌ی‌ 5 ساڵ به‌سه‌ر ده‌رچونی‌ یاسای‌ نه‌وت و غازی‌ هه‌رێم به‌ڵام تائێستا سندوقی‌ داهاته‌ نه‌وتیه‌كان و كۆمپانیاكانی‌ ده‌رهێنان و فرۆشتنی‌ نه‌وتی‌ هه‌رێم دروست نه‌كراون.
له‌ماوه‌ی‌ یه‌ك ساڵی‌ ڕابردودا سه‌ره‌ڕای‌ دروستبونی‌ ده‌یان قه‌یرانی‌ كه‌می‌ و به‌رزبونه‌وه‌ی‌ نرخی‌ سوته‌مه‌نی‌ و نه‌مانی‌ پاره‌ له‌بانكه‌كان, به‌ڵام نێچیرڤان بارزانی‌ به‌بێ گه‌ڕانه‌وه‌ بۆ په‌رله‌مان سه‌دان ملیۆن دۆلار له‌ داهاتی‌ نه‌وتی‌ هه‌رێمی‌ به‌ناوی‌ كه‌ناڵی‌ میدیایی‌ و بۆنه‌كان و ئیمتیازاته‌وه‌ به‌هه‌ده‌رداوه‌, به‌بێ‌ ئه‌وه‌ی‌ كه‌سێك هه‌بێت لێی‌ بپرسێته‌وه‌.