وه‌زاره‌تی سامانه‌ سروشتیه‌كان نرخی نه‌وتی ره‌ش به‌ رێژه‌یه‌كی زۆر له‌ سه‌ر كارگه‌كانی چیمه‌نتۆ و خشت زیاد ده‌كات و داوای پێشه‌كی یه‌ك ساڵ پاره‌ی نه‌وتی ره‌شیان لێده‌كات.

سه‌رچاوه‌یه‌كی ئاگادار به‌ KNNی راگه‌یاند: وه‌زاره‌تی سامانه‌ سروشتیه‌كان به‌ نوسراوێك هه‌ر یه‌ك له‌ كارگه‌كانی چیمه‌نتۆی ماف و بازیان و تاسڵوجه‌ و كارگه‌كانی خشتی ئاگادار كردوه‌ته‌وه‌ كه‌ نرخی یه‌ك تۆن نه‌وتی ره‌شی له‌ 130 دۆلاره‌وه‌ بۆ 225 دۆلار به‌رزكردوه‌ته‌وه‌.

هه‌ر به‌ پێی ئه‌و نوسراوه‌ سه‌رجه‌م ئه‌و كارگانه‌ ده‌بێت پاره‌ی یه‌ك ساڵی ئه‌و نه‌وته‌ ره‌شه‌ پێشه‌كی بده‌ن و ئه‌گه‌ر هه‌ر كارگه‌یه‌كیش پابه‌ند نه‌بێت پێوه‌ی ئه‌وا به‌شه‌ نه‌وتی ده‌بڕن.

به‌رزكردنه‌وه‌ی نرخی نه‌وتی ره‌شیش له‌سه‌ر ئه‌و كارگانه‌ هاوكاته‌ له‌گه‌ڵ نه‌مانی پاره‌ له‌ بانكه‌كانی هه‌رێمی كوردستان و كاریگه‌ری زۆری له‌سه‌ر ئه‌و كارگانه‌ ده‌بێت كه‌ ژماره‌یه‌كی زۆری هاوڵاتیان تیایدا كارده‌كه‌ن و موچه‌ وه‌رده‌گرن.