-
له‌گه‌ڵ نزیكبوونه‌وه‌ی كۆنگره‌ی نێوده‌وڵه‌تیی به‌ره‌نگاربوونه‌وه‌ی تیرۆر له به‌غداد ، ڕێوشوێنی ئه‌منیی توند ده‌گیرێته‌به‌رو له تكریتیش، 14 خانووی تازه دروستكراوی پۆلیس، ته‌قێنرانه‌وه.
بڕیاره هه‌فته‌ی داهاتوو له به‌غداد، كۆنگره‌ی نێوده‌وڵه‌تیی به‌ره‌نگاربوونه‌وه‌ی تیرۆر، به‌ڕێوه بچێت كه تێیدا جگه له پۆلیسی نێوده‌وڵه‌تی، نوێنه‌رانی ئه‌منیی 40 وڵاتی جیهان، به‌شداریی ده‌كه‌ن، بۆ ئه‌و مه‌به‌سته‌ش له ئه‌مڕۆوه له شاری به‌غداد به تایبه‌ت له ناوچه‌ی سه‌وز، رێوشێنی ئه‌منیی توند ده‌گیرێته‌به‌ر.
هاوكات، سه‌رچاوه‌یه‌ك له پۆلیسی تكریت ئاشكرای كرد: شه‌وی ڕابردوو، گروپه توندڕه‌وه‌كان له یه‌ك كاتدا 14 خانووی تازه دروستكراوی پۆلیسیان له گه‌ڕه‌كی دیومی شاری تكریت، ته‌قاندوه‌ته‌وه و كه به هۆیه‌وه سه‌رجه‌م خانووه‌كان روخاون و هێشتا زانیاری سه‌باره‌ت به ژماره‌ی قوربانییانی ئه‌و ته‌قینه‌وانه ئاشكرا نه‌بوه.
دوێنێش له ئه‌نجامی زنجیره‌یه‌ك ته‌قینه‌وه و هێرشی چه‌كداری له ناوچه جیاجیاكانی عێراق، لانیكه‌م، 9 كه‌س كوژران و 29ی دیكه‌ش بریندار بوون.