|
|
|
وته‌كانی مالیكی كاردانه‌وه‌ی عه‌لاوی و كوتله‌ی ئه‌حراریان لێده‌كه‌وێته‌وه |
|
3/10/2014 8:42:58 AM |
ئه‌یاد عه‌لاوی، ده‌ڵێت مالیكی هیچ به‌ڵگه‌یه‌كی بۆ تۆمه‌تبار كردنی وڵاتانی عه‌ره‌بی به تیرۆ نییه و داوای هه‌ڵوه‌شاندنه‌وه‌ی حكومه‌ته‌كه‌ی مالیكی ده‌كات و كوتله‌ی ئه‌حراریش وه‌ڵامی هێرشه‌كه‌ی مالیكی بۆ سه‌ر سه‌در ده‌داته‌وه.
چاوپێكه‌وتنه ته‌له‌فزیۆنیه‌كه‌ی نوری مالیكی له‌گه‌ڵ كه‌ناڵی فرانس 24 كاردانه‌وه‌ی جۆراوجۆری لێكه‌وته‌وه، له‌و چوارچێوه‌یه‌شدا ئه‌یاد عه‌لاوی، سه‌رۆكی لیستی عێراقییه، رایگه‌یاند مالیكی هیچ به‌ڵگه‌یه‌كی بۆ تۆمه‌تبار كردنی قه‌ته‌ر و سعودیه به هاوكاری كردنی تیرۆریزم نییه، چونكه سعودیه له هه‌ڵوێستێكی بوێرانه‌دا چه‌ند گروپێكی خسته ناو لیستی تیرۆره‌وه به‌ڵام مالیكی بی ئاگایه له‌و هه‌وڵانه.
هاوكات عه‌لاوی جه‌ختی له سه‌ر ئه‌وه‌ش كرده‌وه كه حكومه‌ته‌كه‌ی مالیكی توانای به‌ڕێوه‌به‌ردنی هه‌ڵبژاردنێكی پاك و بێگه‌ردی نییه و پێویسته هه‌ڵبوه‌شێنرێته‌وه و حكومه‌تێكی كاربه‌ڕێكه‌ر دابمه‌زرێت بۆ ئه‌وه‌ی كاروباری وڵات تا دوای هه‌ڵبژاردن به‌ڕێوه‌به‌رێت.
ئه‌ندامێكی كوتله‌ی ئه‌حراری سه‌ر به ره‌وتی سه‌در ئاشكرای كرد له ئێستادا ئه‌نجومه‌نی شورای سه‌ر به كوتله‌ی ئه‌حرار سه‌رقاڵی وه‌ڵامدانه‌وه‌ی ره‌سمی ئه‌و هێرشانه‌یه كه مالیكی كردییه سه‌ر موقته‌دا سه‌در و به كه‌سێكی تازه‌كار و نه‌زانی وه‌سفكرد.
|
|
|
|